2026 წლის 6 ოქტომბერს ცნობილი გახდა, რომ Prime Video-მ ლუსი სქორის რომანის, „Things We Never Got Over“-ის სატელევიზიო ადაპტაციისთვის ექვსი ახალი მსახიობი შეარჩია. Deadline-ის ინფორმაციით, სერიალზე Amazon MGM Studios მუშაობს და გადაღებები ახლა კანადაში, ქალაქ ვანკუვერში მიმდინარეობს.
ახალი მსახიობები პროექტში უკვე დამტკიცებულ მთავარ გმირებს შეუერთდებიან. ტელესერიალში მოლი გრიგსი ტყუპი დების, ნაომი და თინა უიტების როლებს შეასრულებს. მეთიუ ნოშკა და ტომი მარტინესი კი ძმების, ნოქს და ნეშ მორგანების პერსონაჟებს განასახიერებენ.
Variety-ის ცნობით, სამსახიობო გუნდს შონ ტილი და სარა ჯეფერი შეუერთდნენ. ტილი ლუსიანის როლს შეასრულებს, ჯეფერი კი – სლოუნისას. სერიალში ასევე მონაწილეობენ მეგან სტოტი ვეილეის და ლილი სიმონსი ლინას როლებში. მათ ენტონი კეივანი და ჯობეთ უილიამსი დაემატნენ, რომლებიც სტეფისა და ლაიზა ჯეის როლებს ითამაშებენ.
ლუსი სქორი და სერიალის შემოქმედებითი გუნდი
საპილოტე ეპიზოდის სცენარი ერიკ ჩარმელომ და ნიკოლ სნაიდერმა დაწერეს. ისინი პროექტის თანაშოურანერები და აღმასრულებელი პროდიუსერები არიან. თავდაპირველად ადაპტაციის ავტორად, შოურანერად და აღმასრულებელ პროდიუსერად ემი რარდინი განიხილებოდა. სერიალის შექმნაში ასევე ჩართულია ჯინა ჯიროლამო კომპანია Strega Stories-დან, რომელიც აღმასრულებელ პროდიუსერად მუშაობს.
სატელევიზიო ადაპტაციის პროდიუსერი თავად წიგნის ავტორიცაა. ლუსი სქორმა ნაწარმოები 2022 წელს გამოსცა და ის „Knockemout“-ის ტრილოგიის პირველი წიგნია.
„The Love Hypothesis“-ის გაგრძელება
პარალელურად, The Hollywood Reporter-ის ცნობით, Prime Video ალი ჰეიზელვუდის წიგნის მიხედვით გადაღებული ფილმის, „The Love Hypothesis“-ის სიკველს გადაიღებს. ეკრანიზაციის პრემიერა პლატფორმაზე 23 სექტემბერს შედგა. ფილმში დოქტორ ადამ კარლსენისა და ოლივ სმიტის როლები ტომ ბეიტმენმა და ლილი რაინჰარტმა შეასრულეს.
საკუთარი პერსონაჟის განვითარებაზე საუბრისას ტომ ბეიტმენმა აღნიშნა:
ეს პერსონაჟი ძალიან მიყვარს. მომწონს, საიდან იწყებს, რა გზას გადის და სად ასრულებს – ყველა ეს მომენტი.
