ბრიტანული ფენტეზის საზოგადოებამ ბრიტანული ფენტეზის ჯილდოს (British Fantasy Awards) წლევანდელი გამარჯვებულები გამოავლინა. როგორც გამოცემა Locus-ი წერს, საზეიმო ცერემონია ფესტივალ Fantasycon 2026-ზე გაიმართა, რომელსაც შოტლანდიის ქალაქმა გლაზგომ 9–11 ოქტომბერს უმასპინძლა.
საუკეთესო ფენტეზი რომანისთვის განკუთვნილი რობერტ ჰოლდსტოკის ჯილდო (Robert Holdstock Award) ქელ ვუდსის წიგნმა „Upon a Starlit Tide“ დაიმსახურა. საუკეთესო ჰორორ რომანის ნომინაციაში ოგასტ დერლეთის ჯილდო (August Derleth Award) სტივენ გრემ ჯონსის ნაწარმოებ „The Buffalo Hunter Hunter“-ს გადაეცა. საუკეთესო ნოველად კი ამალ ელ-მოჰთარის წიგნი „The River Has Roots“ დასახელდა.
ბრიტანული ფენტეზის ჯილდოს სხვა ლაურეატები
მოკლე პროზის კატეგორიაში სი ელ ჰელისენის მოთხრობამ „Shadow Jack“ გაიმარჯვა, საუკეთესო კრებულად კი კრისტოფერ კოლდუელის „Call and Response“ დასახელდა. საუკეთესო ანთოლოგიის ჯილდო კრისტი პარკ კულსკის რედაქტორობით გამოცემულ კრებულ „Silk & Sinew: A Collection of Folk Horror From the Asian Diaspora“-ს ერგო. არამხატვრული ლიტერატურის ნომინაციაში ჩუკვუნონსო ეზეიოკეს წიგნმა „Nigerian Speculative Fiction: The Evolution“ გაიმარჯვა, ხოლო დებიუტანტის კატეგორიაში ჯილდო ნაწარმოებისთვის „The Outcast Mage“ ანაბელ კემპბელმა მოიპოვა.
კარლ ედვარდ ვაგნერის ჯილდო (Karl Edward Wagner Award) ჯეინ ჯონსონს გადაეცა, Legends of Fantasycon-ის ჯილდო (Legends of Fantasycon Award) კი ქლოი იეიტსს ერგო. ცერემონიაზე ჯილდო ასევე პოდკასტმა „The Folklore Podcast“ და სი ელ ჰელისენის წიგნმა „The Shape of Monsters“ დაიმსახურა, რომელიც ომარი დაგლასმა გაახმოვანა.
