წიგნების ეკრანზე გადატანის პროცესი ერთდროულად რამდენიმე გახმაურებული პროექტით გრძელდება. სიახლეები მოიცავს როგორც კინოთეატრებში გამოსულ სურათებს, ისე ახალ სატელევიზიო სერიალებსა და გადაღების პროცესში მყოფ ადაპტაციებს.
„Whalefall“ – გადარჩენის დრამა კაშალოტის მუცელში
დანიელ კრაუსის სამეცნიერო სიზუსტით დაწერილი რომანი ახალგაზრდა მყვინთავზე მოგვითხრობს, რომელიც კაშალოტმა მთლიანად გადაყლაპა. წიგნის მიხედვით გადაღებული სრულმეტრაჟიანი ფილმი კინოთეატრებში 16 ოქტომბერს გამოვიდა. როგორც The Hollywood Reporter-ი წერს, რეჟისორმა ბრაიან დაფილდმა სცენარი თავად ავტორთან ერთად შექმნა. 20th Century-ის ფილმში მთავარი გმირის, ჯეი გარდინერის როლს ოსტინ აბრამსი ასრულებს, მამის სახეს კი ჯოშ ბროლინი განასახიერებს. ადაპტაციისთვის დაფილდმა პერსონაჟის ასაკი გაზარდა: მოზარდის ნაცვლად, ის კოლეჯის სტუდენტია, რომელიც მშობლიურ მხარეში მამის წყალქვეშ დარჩენილი ნეშტის ამოსატანად ბრუნდება.
„The Party“ – ბრიტანული კლასობრივი თრილერი
ბრიტანულმა ტელეკომპანია ITV-მ თრილერის ჟანრის სერიალი გამოუშვა, რომელიც მწერალ ელიზაბეთ დეის რომანს ეფუძნება. როგორც Deadline-ის მასალაში ვკითხულობთ, სცენარის ადაპტაცია სარა სოლემანის ეკუთვნის, პროექტის თანაპროდიუსერი კი World Productions-თან ერთად ლუკ ევანსის კომპანია Stoic Productions-ია. სიუჟეტის ცენტრშია ჟურნალისტი მარტინ გილმორი (ლუკ ევანსი), რომლის მეგობრობა მდიდარ პოლიტიკოს ბენ ფიცმორისთან სოფლის მამულში გამართულ წვეულებაზე საიდუმლოებების გამჟღავნების საფრთხის წინაშე დგება. სერიალის პრემიერას თითქმის 1,5 მილიონმა მაყურებელმა უყურა, მის გლობალურ დისტრიბუციას კი MIPCOM-ზე ITV Studios უზრუნველყოფს.
სერიალში განხილულ თემატიკაზე ლუკ ევანსმა აღნიშნა:
სხვა ქვეყნებშიც შეიძლება არსებობდეს კლასობრივი დაყოფა, მაგრამ ჩვენთან ეს განსაკუთრებით თვალსაჩინოა. სერიალი ნათელს ჰფენს იმ სამყაროს, რომლის შესახებაც, როგორც მუშათა კლასის წარმომადგენელმა ბიჭმა, ბევრი არაფერი ვიცოდი.
„7 Miles Out“ – კეროლ მორლის ავტობიოგრაფიული ფილმი
კეროლ მორლიმ საკუთარი ნახევრად ავტობიოგრაფიული რომანის მიხედვით სრულმეტრაჟიანი ფილმი გადაიღო, რომელიც ქალაქ სტოკპორტში მამის თვითმკვლელობის შემდეგ ავტორის მოზარდობის წლებსა და მწუხარებას ასახავს. სურათის მსოფლიო პრემიერა BFI-ის ლონდონის კინოფესტივალის ოფიციალურ საკონკურსო პროგრამაში გაიმართა. ფილმში მთავარ როლებს ლუსი ჰალიდეი, ეიდან გილენი და ჯემა უელანი ასრულებენ. მთლიანად სტოკპორტში გადაღებულ ნამუშევარში ჟღერს როგორც კეროლ მორლისა და კარლი პარადისის ორიგინალური მუსიკა, ისე Joy Division-ის, New Order-ისა და The Raincoats-ის კომპოზიციები.
„ღვთაებრივი კომედია“ – დანტეს პოემის საშინელებათა ადაპტაცია
რეჟისორმა პატრისიო ვალადარესმა დანტე ალიგიერის XIV საუკუნის ეპიკური პოემის, „ღვთაებრივი კომედიის“ (The Divine Comedy) მიხედვით თანამედროვე ზებუნებრივი საშინელებათა ფილმი გადაიღო, რომელიც კონკრეტულად „ჯოჯოხეთის“ ნაწილზეა აგებული. გადაღებები იტალიური Anxur Films-ისა და ირლანდიური Skincrawl Limited-ის თანამშრომლობით უკვე დასრულდა, მსოფლიო გაყიდვებს კი Skincrawl გაუძღვება. როგორც Variety წერს, სცენარისტ ლორის კურჩის ადაპტაციაში მგლოვიარე მწერალი მეუღლის გადასარჩენად ჯოჯოხეთში ყოფილ მღვდელთან, ვირგილიუსთან ერთად ჩადის. ფილმში მთავარ როლებს კრისტოფერ რიგი, მეთიუ მეტკალფი, ტილდა მეცოლა და ფადჰილა ოსმანი ასრულებენ, პროექტს კი American Film Market-სა და European Film Market-ზე წარადგენენ.
ვერონიკა როთის „The Sixth Faction“ და „დივერგენტის“ სამყარო
ვერონიკა როთმა 6 ოქტომბერს ახალი წიგნი, „The Sixth Faction“ გამოსცა, რომელშიც ბესტსელერად ქცეული სერია „დივერგენტი“ (Divergent) ალტერნატიული სამყაროს სახით გადაიაზრა. ახალ ამბავში ბეატრის „ტრის“ პრაიორი არჩევანის ცერემონიაზე განსხვავებულ გადაწყვეტილებას იღებს. ეს დაგეგმილი დილოგიის პირველი ნაწილია, ხოლო მეორე წიგნი, „The Last Testimony“, თებერვალში გამოვა. Lionsgate-მა 2014–2016 წლებში როთის ტრილოგიის მიხედვით სამი ფილმი გამოუშვა, თუმცა მეოთხე ნაწილის, „Ascendant“-ის გადაღება ფილმ „Allegiant“-ის დაბალი სალარო შემოსავლების გამო შეწყვიტა. მოგვიანებით სატელევიზიო პროექტიც გაუქმდა, როდესაც მონაწილეობაზე უარი თქვეს ორიგინალური ფილმების ვარსკვლავებმა, შეილინ ვუდლიმ და თეო ჯეიმზმა.
