რამდენიმე ცნობილი წიგნისა და კომიქსის ეკრანიზაციაზე მუშაობა აქტიურ ფაზაში შევიდა. როგორც გამოცემები Deadline-ი, Variety და The Hollywood Reporter-ი წერენ, სიახლეები ისეთ ავტორებს ეხება, როგორიცაა ჯეინ ოსტინი, მიკ ჰერონი და დენიელ პინკუოტერი.
„გრძნობა და გონება“ (Sense and Sensibility) – ჯეინ ოსტინი
ოსტინის ცნობილი რომანის ახალი კინოადაპტაცია, რომლის რეჟისორიც ჯორჯია ოუკლია, კინოთეატრებში წელს გამოვიდა. Working Title-ის მხატვრულ ფილმში მთავარ როლებს დეიზი ედგარ-ჯოუნსი და ესმე კრიდ-მაილზი ასრულებენ. პროექტის სცენარისტმა დიანა რეიდმა ავტორის შემოქმედებაზე საუბრისას აღნიშნა:
დიდი ხელოვნება მუდმივად ექვემდებარება ადაპტაციას. ვფიქრობ, ჯეინ ოსტინმა მიაღწია იმ საფეხურს, სადაც ის თითქმის შექსპირს უტოლდება.
„Bad Actors“ – მიკ ჰერონი
ჰერონის ამ რომანის ეკრანიზაციაზე რეჟისორი რობერტ მაკკილოპი მუშაობს, სცენარი კი ბენ ვანსტოუნმა მოამზადა. წიგნი სტრიმინგ პლატფორმა Apple TV-ის სერიალ „Slow Horses“-ის მეშვიდე სეზონის საფუძველია. ახალ ეპიზოდებში როლებს ვარადა სეთუ, ითან მურჰაუსი, ტაპენს მიდლტონი, მერაბ ნინიძე და ჯოშუა მაკგუაირი შეასრულებენ. ამასთანავე, სერიალი მერვე სეზონისთვისაც განახლდა, რომელიც მწერლის „სლაუ ჰაუსის“ ციკლის მეცხრე რომანს, „Clown Town“-ს დაეფუძნება.
„Barry Loser“ – ჯიმ სმითი
სმითის საბავშვო წიგნების სერიის მიხედვით 52-ეპიზოდიანი ორგანზომილებიანი ანიმაციური სერიალი იქმნება, რომელზეც Big Little Fish Television-ი და Rain Frog-ი მუშაობენ. ნამუშევარი ბრიტანეთში პლატფორმა ITVX Kids-მა შეიძინა, ანიმაციას კი ფლორენციაში მოქმედი DogHead Animation-ი შექმნის. პროდიუსერები დაფინანსების მოზიდვის დასრულებას 2027 წლის პირველი კვარტალის ბოლოსთვის გეგმავენ. სერიალის წარმოება ოფიციალურად იმავე წლის მეორე კვარტალის დასაწყისში დაიწყება.
„Afterlife with Archie“ – რობერტო აგირე-საკასა და ფრანჩესკო ფრანკავილა
ავტორთა ეს ბესტსელერი კომიქსი ქალაქ რივერდეილის შესახებ მოგვითხრობს, რომელსაც თინეიჯერი ჯადოქრის ჩაშლილი ზებუნებრივი შელოცვის შემდეგ ზომბი-აპოკალიფსი დაატყდება თავს. Disney+-ის სატელევიზიო სერიალის წარმოება ივლისში დამტკიცდა, მისი პრემიერა კი 2027 წლის ჰელოუინზე შედგება. პროექტის აღმასრულებელმა პროდიუსერმა ალფონსო გომეს-რეხონმა საპილოტე და მეორე ეპიზოდის რეჟისორობაც ითავა.
„Lizard Music“ – დენიელ პინკუოტერი
პინკუოტერის ამ რომანის ეკრანიზაცია მხატვრული კინოსა და კომპიუტერული გრაფიკის ჰიბრიდულ ფილმად გადაიქცევა, რომლის რეჟისორი და სცენარისტიც ბენი საფდია. სიუჟეტის ცენტრშია ბიჭი, რომელიც მუსიკოს ხვლიკებს აღმოაჩენს, შემდეგ კი ჩიკენ მენსა (რომლის როლსაც დუეინ ჯონსონი ასრულებს) და მის 111 წლის ქათამთან ერთიანდება. Amazon MGM Studios-მა ფილმის კინოთეატრებში ჩვენება 2027 წლის 25 დეკემბერს დაგეგმა.
„D’Orc“ – ბრეტ ბინი
ბინის ფენტეზის ჟანრის კომიქსების სერიის მიხედვით, რომელიც გამომცემლობა Image Comics-ში გამოდის, სრულმეტრაჟიან მხატვრულ ფილმს გადაიღებენ. ეკრანიზაციის უფლებები კომპანია Sony Pictures-მა მოიპოვა. თავად ავტორი პროექტის სცენარის ადაპტაციაზე იმუშავებს.
