ურსულა უილსის გამოუქვეყნებელი მოთხრობის ეკრანიზაცია, ფენტეზის ჟანრის ფილმი „Wicker“, რომელშიც მთავარ როლებს ოლივია კოლმანი და ალექსანდერ სკარსგარდი ასრულებენ, ამერიკის შეერთებული შტატების კინოთეატრებში გამოვიდა. როგორც Deadline-ი იტყობინება, სადისტრიბუციო კომპანია Black Bear-მა ფილმი ამერიკულ ეკრანებზე 23 ოქტომბერს გამოუშვა, გაერთიანებულ სამეფოში კი პრემიერა 30 ოქტომბერს იგეგმება.
პროდიუსერმა ჯასტინ ლოტროპმა ურსულა უილსის მოთხრობა „The Wicker Husband“ ინტერნეტში 2021 წელს აღმოაჩინა. იმავე წელს, კარანტინის პერიოდში, რეჟისორთა წყვილმა – ალექს ჰიუსტონ ფიშერმა და ელენორ უილსონმა – სცენარი ორ კვირაში დაწერა. იგავისებური სიუჟეტის ცენტრში საზოგადოებისგან გარიყული მეთევზე ქალია, რომელიც ადგილობრივ ოსტატს მოწნულ ქმარს შეუკვეთავს. კალათების დამამზადებლის როლს პიტერ დინქლეიჯი ასრულებს, მოწნულ ქმარს კი განასახიერებს სკარსგარდი, რომელსაც მინიმალური კომპიუტერული ეფექტების პარალელურად რეალური კოსტიუმი აცვია.
სამსახიობო გუნდში ასევე არიან ელიზაბეთ დებიკი, მარლი სუი და ნაბჰან რიზვანი. პროექტს კოლმანი თავის საპროდიუსერო კომპანია South Of The River Pictures-თან ერთად შეუერთდა, Votiv Films-სა და Yoki, Inc.-თან თანამშრომლობით, ხოლო ფილმის დაფინანსებაზე Topic Studios-მ და Tango-მ იზრუნეს. Black Bear-მა პროექტი ჯერ კიდევ 2023 წელს, ამერიკის კინობაზრობაზე წინასწარ გაყიდა. ძირითადი გადაღებები 2024 წლის სექტემბრიდან ნოემბრამდე უნგრეთში მიმდინარეობდა, მსოფლიო პრემიერა კი წელს სანდენსის კინოფესტივალზე შედგა.
საინტერესო დეტალებს გამოცემა Reactor (SFF)-ი წერს. რეჟისორები თავდაპირველად კოლმანს ეუბნებოდნენ, რომ ინტიმური სცენები წმინდა კომედიური ხასიათის იქნებოდა, თუმცა გადაღების პროცესში ყველაფერი ბევრად უფრო გრძნობადი აღმოჩნდა. გადასაღებ მოედანზე მსახიობებთან ინტიმური სცენების კოორდინატორი იტა ო’ბრაიენი მუშაობდა, რომელიც მოძრაობებს ცეკვის მსგავსად დგამდა. საძინებლის ერთ-ერთი ეპიზოდის რეპეტიციისა და გადაღების დროს საწოლი კოლმანისა და სკარსგარდის ქვეშ გატყდა კიდეც. პროექტში მონაწილეობის შესახებ ოლივია კოლმანმა აღნიშნა:
ყოველთვის აღფრთოვანებული ვარ, როცა ისეთ რამეს ვეცნობი, რაც ადრე არ წამიკითხავს.
