პოპულარული ვიდეოთამაშ „Elden Ring“-ის კინოადაპტაციის საერთაშორისო სტრიმინგის უფლებები მრავალმილიონიანი წინასწარი გარიგებით Amazon MGM Studios-მა შეიძინა. როგორც გამოცემა Deadline-ი წერს, დამოუკიდებელი სტუდია A24 ამ პროექტით American Film Market-ზე გადის. შეთანხმება რამდენიმე საერთაშორისო ტერიტორიას მოიცავს და ე.წ. pay-1 სტრიმინგის ფანჯარას ითვალისწინებს. ფილმის ბიუჯეტი 175–200 მილიონ დოლარად არის შეფასებული, რაც კომპანიის ისტორიაში ყველაზე მასშტაბური მაჩვენებელია. ამასთან, „Elden Ring“-ის ეკრანიზაცია კინო- თუ სატელევიზიო ბაზრობაზე ოდესმე გატანილ დამოუკიდებელ პროექტებს შორის ყველაზე დიდი ბიუჯეტის მქონე სურათია.
ფილმის წარმოება სრულად A24-მა დააფინანსა. ეპიკური მძაფრსიუჟეტიანი სურათის სცენარი ალექს გარლანდმა დაწერა და რეჟისორიც თავად არის. გადაღებები წელს ზაფხულში დასრულდა, ახლა კი პროექტი პოსტპროდუქციის ეტაპზეა, ვიზუალურ ეფექტებზე კი Industrial Light & Magic-ი მუშაობს. სურათის სცენარი, რომელიც ვიზუალურ ჩანართებთან ერთად სულ მცირე 180 გვერდისგან შედგება, პოტენციურ მყიდველებს განსაკუთრებული გასაიდუმლოების პირობებში წარუდგინეს. ფილმის პრემიერა კინოთეატრებსა და Imax-ში 2028 წლის მარტში იგეგმება.
„Elden Ring“-ის ეკრანიზაცია და ვარსკვლავური გუნდი
ფილმში მთავარ გმირს მსახიობი კიტ კონორი განასახიერებს. სამსახიობო შემადგენლობაში ასევე შედიან ბენ უიშო, კეილი სპენი, ტომ ბერკი, ჰავანა როუზ ლიუ, სონოია მიზუნო, ჯონათან პრაისი, რუბი კრუზი და ნიკ ოფერმანი. პროექტზე გამოცდილი შემოქმედებითი ჯგუფი მუშაობს: კოსტიუმების მხატვარია ჯენი ბივანი, გრიმისა და ვარცხნილობის დიზაინერი – პოლ გუჩი, დამდგმელი მხატვრები – მარკ დიგბი და მიშელ დეი, ხოლო დამდგმელი ოპერატორი – დეივიდ ჯ. ტომპსონი. ფილმის პროდიუსერები არიან პიტერ რაისი, ენდრიუ მაკდონალდი, ალონ რაიხი, ვინს ჯერარდისი და ჯორჯ რ. რ. მარტინი.
ორიგინალური ვიდეოთამაში Bandai Namco-მ 2022 წელს გამოუშვა. თამაში FromSoftware-მა რეჟისორ ჰიდეტაკა მიაძაკის ხელმძღვანელობით შექმნა, მისი სამყარო კი ფენტეზის ჟანრის ცნობილ მწერალ ჯორჯ რ. რ. მარტინთან თანამშრომლობით შეიქმნა. 2022 წლის შემდეგ ვიდეოთამაშის 30 მილიონზე მეტი ასლი გაიყიდა. მომავალში რეჟისორი ალექს გარლანდი და სტუდია A24 კიდევ ერთ პროექტს გეგმავენ: 2027 წელს ისინი სამეცნიერო-ფანტასტიკური ფილმის გადაღებას აპირებენ, რომელშიც მთავარ როლს ზენდეია შეასრულებს.
