უკრაინულ გამომცემლობებზე, სტამბებსა და საწყობებზე რუსულ თავდასხმებს ექვსი ადამიანი ემსხვერპლა, რვა მილიონზე მეტი წიგნი კი განადგურდა. როგორც გამომცემელთა საერთაშორისო ასოციაცია (IPA) იტყობინება, ორგანიზაციამ მხარდაჭერისა და დაფინანსების არაერთი პროგრამა გააერთიანა, რათა ომის პირობებში უკრაინელმა გამომცემლებმა საქმიანობის გაგრძელება შეძლონ.
ადგილობრივი გამომცემლობების დასახმარებლად უკრაინის კულტურის სამინისტრომ, KSE-ის ფონდმა, უკრაინის წიგნის ინსტიტუტმა და „წიგნის არსენალმა“ მცირე საგამომცემლო სახლებისთვის საგრანტო პროგრამა შეიმუშავა. ახალი ინიციატივა მცირე საწარმოებს უწყვეტი მუშაობის შენარჩუნებასა და ომით გამოწვეული შეფერხებებისადმი მდგრადობის გაზრდაში დაეხმარება.
ამავე მიზნით საერთაშორისო საგამომცემლო ინდუსტრიამ სოლიდარობის რამდენიმე პროექტი წარადგინა. უნივერსიტეტების გამომცემლობათა ასოციაციამ უკრაინელი კოლეგების დასახმარებლად კრაუდფანდინგის ინიციატივა შექმნა, გერმანული Börsenverein des Deutschen Buchhandels-ი სპეციალური სოლიდარობის პროგრამას ახორციელებს, ევროპელ გამომცემელთა ფედერაცია (FEP) კი პროექტ „Tales of EUkraine“-ის პოპულარიზაციას უწყობს ხელს.
დახმარება უკრაინელი გამომცემლების გადასარჩენად
საერთაშორისო პარტნიორების აქტიურობის აუცილებლობაზე საუბრისას ჯესიკა ზენგერმა აღნიშნა:
უკრაინულ წიგნებზე ეს თავდასხმები უკრაინული კულტურის განადგურების საზიზღარი მცდელობის ნაწილია.
უკრაინის გამომცემელთა ასოციაციამ გლობალურ პარტნიორებს მოუწოდა, კულტურის განადგურების საკითხი წიგნის ბაზრობების, ინდუსტრიული ფორუმებისა და IPA-ს ღონისძიებების დღის წესრიგში დატოვონ. ორგანიზაცია საერთაშორისო საგანგებო მექანიზმების შექმნასაც ითხოვს, რათა დანგრეული სტამბები აღდგეს და სასკოლო სახელმძღვანელოების ბეჭდვა არ შეწყდეს. გარდა ამისა, ასოციაცია ითხოვს ერთობლივ საერთაშორისო ძალისხმევას ფონდების მოსაძიებლად და დაზარალებული გამომცემლების, მწერლების, მესტამბეების, სკოლებისა და ბიბლიოთეკების ინტერესების დასაცავად.
უკრაინის წიგნის ინსტიტუტი კი საერთაშორისო ორგანიზაციებისგან რუსულ სტრუქტურებთან ყოველგვარი თანამშრომლობის შეწყვეტასა და კულტურულ მემკვიდრეობაზე იერიშების შესახებ ცნობიერების ამაღლებას მოითხოვს. ინსტიტუტმა უცხოურ საზოგადოებას პირდაპირ უკრაინულ გამომცემლობებთან პარტნიორობისა და სამედიცინო საქველმოქმედო ორგანიზაციებისა თუ უკრაინის შეიარაღებული ძალების მხარდაჭერისკენ მოუწოდა. საგამომცემლო სექტორის წინაშე არსებულ ვითარებაზე 30 სექტემბერს ლვივის წიგნის ფორუმზე გამოსვლისას IPA-ს პრეზიდენტმა გვანცა ჯობავამაც ყურადღება გაამახვილა.
