სამხრეთ კორეაში ახალგაზრდებს შორის კითხვა პოპულარულ კულტურულ მოძრაობად იქცა, რომელსაც ქვეყანაში „ტექსტ-ჰიპს“ უწოდებენ. როგორც იტალიური გამოცემა Giornale della Libreria წერს, ეს ტენდენცია განსაკუთრებით 20-იდან 30 წლამდე ასაკის ადამიანებში გავრცელდა. ახალი ფენომენი წიგნის მაღაზიებსა და ბიბლიოთეკებში სიარულს, საყვარელი ნაწყვეტების გადაწერასა და სოციალურ ქსელებში კითხვით გამოწვეული ემოციებისა და გამოცდილების გაზიარებას გულისხმობს.
მარტში გამოქვეყნებული კითხვის ეროვნული კვლევის მიხედვით, 2025 წელს 19-იდან 29 წლამდე ასაკის კორეელებში კითხვის მაჩვენებელმა 75,3%-ს მიაღწია, რაც 2023 წელთან შედარებით 0,8%-იან ზრდას აჩვენებს. ამავდროულად, ზრდასრული მოსახლეობის საერთო მაჩვენებელი 38,5%-მდე შემცირდა, რაც ერთ სულზე წელიწადში საშუალოდ მხოლოდ 2,4 წაკითხულ წიგნს შეადგენს – ეს მონაცემი ორ წელიწადში 4,5%-ითა და 1,5 წიგნით დაეცა. 20-იდან 29 წლამდე ასაკის მკითხველებში ელექტრონულმა წიგნებმა (59,4%) მკვეთრად გადაასწრო ბეჭდურ გამოცემებს (45,1%), ხოლო აუდიოწიგნების აუდიტორია 60 წლამდე ყველა ასაკობრივ ჯგუფში გაიზარდა.
როგორ ერგებიან გამომცემლები „ტექსტ-ჰიპის“ ტალღას
მკითხველის გააქტიურებას ქალაქის მესვეურებიც გამოეხმაურნენ: აპრილში, წიგნის მსოფლიო დღეს, სეულის მუნიციპალიტეტმა საჯარო მოედნები და სივრცეები ღია ცის ქვეშ ბიბლიოთეკებად აქცია, სადაც სავარძლები, წიგნის თაროები და მოსასვენებელი კუთხეები მოაწყო. საგამომცემლო სექტორიც ინოვაციურ მეთოდებს მიმართავს. მაგალითად, 1966 წელს დაარსებულმა გამომცემლობა Minumsa-მ კვების კომპანიასთან ერთად სპეციალური პური, Minumsa Bread-ი გამოუშვა, რომლის გაყიდვებმაც ერთ მილიონ ერთეულს გადააჭარბა. შეფუთვებში სოციალური ქსელებისთვის შექმნილი 20 საკოლექციო სანიშნიდან ერთ-ერთი შემთხვევით ხვდებოდა. ამავე გამომცემლობის YouTube-არხს, Minumsa TV-ს, სადაც თანამშრომელთა ვლოგები, ოფისის ყოველდღიურობა და რეკომენდაციები ქვეყნდება, 570 000-ზე მეტი გამომწერი ჰყავს.
ამ ტენდენციის პარალელურად, ქვეყანაში ტრადიციული წიგნის მაღაზიების კრიზისი გრძელდება. ორ წელიწადში ფიზიკური მაღაზიების რიცხვი 14,2%-ით შემცირდა და 2716-იდან 2331-ამდე ჩამოვიდა, დისტრიბუციამ კი ციფრულ არხებში, სოციალურ კომერციაში, პოპ-აპ მაღაზიებსა და ონლაინპლატფორმებზე გადაინაცვლა. გარდაქმნების ფონზე გამომცემლობა Munhakdongne-ს დამფუძნებელმა კანგ ბიონგ-სონმა თავისი 41,5%-იანი საკონტროლო წილი გასაყიდად გამოიტანა, რომლის ფასი ათობით მილიარდი ვონია. აქციების შეძენას ოთხი კომპანია ცდილობს, რომელთა შორის ხელოვნური ინტელექტის ისეთი სტარტაპიც არის, რომელსაც საგამომცემლო საქმესთან მანამდე შეხება არ ჰქონია.
