ლონდონში, ბრიტანეთის ბიბლიოთეკაში აგათა კრისტის გამოფენა გაიხსნა, რომელიც მწერლის პირად ნივთებს, შემოქმედებით პროცესსა და მოგზაურობებს ეძღვნება. როგორც გამოცემა Infobae წერს, 30 ოქტომბერს გახსნილი ექსპოზიცია სახელწოდებით „Agatha Christie: Un mundo de misterio“ დამთვალიერებლებს 2027 წლის ივნისამდე უმასპინძლებს. საგამოფენო სივრცეში შესულ სტუმრებს წიგნებისგან შექმნილი დიდი პანო ეგებება.
ექსპოზიცია ხუთ თემატურ სივრცედაა დაყოფილი: აგარაკი, აფთიაქი, მატარებელი, არქეოლოგიური გათხრები და თეატრი. პირველი განყოფილება დეტექტივების ავტორის ბავშვობის აგარაკს აცოცხლებს და მის ლიტერატურულ საწყისებსა და 1920 წელს გამოსულ სადებიუტო რომანს, „იდუმალი საქმე სტაილზში“ (The Mysterious Affair at Styles), ეთმობა. მეორე დარბაზში პირველი მსოფლიო ომის დროინდელი აფთიაქია აღდგენილი, სადაც საწამლავის ბოთლები, 1917 წლის დოკუმენტები და ტოქსინებზე ის ჩანაწერებია გამოფენილი, რომლებიც კრისტიმ მოხალისე ექთნად მუშაობისას გააკეთა. მესამე სექცია კი „აღმოსავლეთის ექსპრესის“ (Orient Express) მატარებელს აღადგენს – სავარძლებით, ბარით, კუპეებით, მატარებლის ხმოვანი ეფექტებითა და რომანის, „მკვლელობა „აღმოსავლეთის ექსპრესში““ (Murder on the Orient Express), ეკრანიზაციებით.
არქეოლოგიური გათხრების განყოფილება 1930-იან წლებსა და არქეოლოგ მაქს მალოუენთან კრისტის მეორე ქორწინებას ასახავს. ამავე სივრცეში წარმოდგენილია მწერლის რვეულები, ნაბეჭდი მონახაზები, პირადი საბეჭდი მანქანა და იმ სერფინგის დაფის ასლი, რომელსაც 1922 წელს ჰავაიზე იყენებდა. იქვე მოწყობილია ინტერაქციული თამაშიც სამხილების მოსაძიებლად. ბოლო სექცია თეატრის რეკონსტრუქციაა და პიესა „სათაგურს“ (The Mousetrap) ეძღვნება, რომელიც ლონდონის ვესტ-ენდში 1952 წლის ნოემბრიდან უწყვეტად იდგმება.
აგათა კრისტი 1890 წლის 15 სექტემბერს სამხრეთ-დასავლეთ ინგლისის ქალაქ ტორკიში დაიბადა და 85 წლის ასაკში, 1976 წლის 12 იანვარს უოლინგფორდში გარდაიცვალა. მედიისთვის გამართულ წინასწარ ჩვენებას 29 ოქტომბერს მწერლის შვილთაშვილი ჯეიმზ პრიჩარდი დაესწრო. მან ხაზი გაუსვა, რომ კრისტიმ 1920-იან წლებში დედამიწას შემოუარა, დაახლოებით 1928 წელს კი ბაღდადში მარტო გაემგზავრა. ჯეიმზ პრიჩარდმა წინაპრის შესახებ აღნიშნა:
ის თავგადასავლების უაღრესად მოყვარული, მომხიბვლელი და ცნობისმოყვარე ადამიანი იყო.
