ფრანკფურტის 77-ე წიგნის ბაზრობა (15-19 ოქტომბერი, 2025), რომელიც თაობებს შორის კითხვის სიყვარულისა და გლობალური დისკურსის ცენტრად იქცა, ზრდის დინამიკას ინარჩუნებს. ღონისძიებას, წინა წელთან შედარებით, კიდევ უფრო მეტი — ჯამში 238,000 ვიზიტორი ეწვია, მათ შორის 118,000 პროფესიონალი და 120,000 ფართო საზოგადოების წარმომადგენელი 131 ქვეყნიდან. ეს მონაცემები კიდევ ერთხელ ხაზს უსვამს ფრანკფურტის წიგნის ბაზრობის, როგორც საერთაშორისო საგამომცემლო ინდუსტრიის წამყვანი მოვლენისა და ლიტერატურის ფესტივალის, უნიკალურ სტატუსს.
გამოფენის პირველ დღეებში პროფესიონალ ვიზიტორთა რაოდენობა, 2024 წელთან შედარებით, 3%-ით გაიზარდა. განსაკუთრებით მაღალი აქტივობა დაფიქსირდა პარასკევს, ხოლო შაბათს ბაზრობაზე დასასწრები ყველა ბილეთი სრულად გაიყიდა.
საგამოფენო სივრცეებში წარმოდგენილი იყო 4,350-მდე გამომცემელი. სრულად დაჯავშნილი იყო „ლიტერატურული აგენტებისა და სკაუტების ცენტრისა“ (LitAg) და „გამომცემელთა უფლებების ცენტრის“ (PRC) სამუშაო მაგიდები, სადაც 33 ქვეყნის 357 სააგენტოსა და გამომცემლობის წარმომადგენლებმა 44,900-ზე მეტი შეხვედრა გამართეს. ღონისძიებას 7,800-ზე მეტი მედიის წარმომადგენელი აშუქებდა.
შეგვიძლია ვთქვათ, რომ ხუთი წარმატებული და ინტენსიური დღე გვქონდა – ჩვენი სიძლიერე იმაშია, რომ ფრანკფურტი აერთიანებს წიგნის პროფესიონალებსა და ლიტერატურის მოყვარულებს მთელი მსოფლიოდან. ჩვენ ვქმნით სივრცეს, რომელიც ერთდროულად არის ბაზარიც და ლიტერატურული ფესტივალიც.
განაცხადა ფრანკფურტის წიგნის ბაზრობის დირექტორმა, იურგენ ბოსმა.Frankfurt Calling – გლობალური დისკუსიების პლატფორმა
ბაზრობის კულტურულ-პოლიტიკურმა პროგრამამ, Frankfurt Calling, მსოფლიოს წამყვანი ხმები თანამედროვეობის ყველაზე აქტუალურ საკითხებზე სასაუბროდ გააერთიანა. ნობელის პრემიის ლაურეატმა მარია რესამ და ნატოს ყოფილმა გენერალურმა მდივანმა იენს სტოლტენბერგმა სოციალური მედიისა და ხელოვნური ინტელექტის ეპოქაში ციფრული დეზინფორმაციის საფრთხეებზე ისაუბრეს. „ჩვენ საინფორმაციო არმაგედონის ბოლო ორ წუთში ვიმყოფებით“, — აღნიშნა რესამ. სტოლტენბერგმა კი ხაზი გაუსვა დამოუკიდებელი პრესის მხარდაჭერის აუცილებლობას.
წიგნიდან ეკრანამდე: აუდიოწიგნები, ფილმები და თამაშები
ღონისძიებამ „წიგნიდან ეკრანამდე 2025“ (Book-to-Screen Day 2025) ნათლად აჩვენა, თუ რამდენად იზრდება კონტენტის განვითარების მნიშვნელობა გამომცემლობებისთვის, კინოინდუსტრიისა და სათამაშო სტუდიებისთვის. 500-ზე მეტმა მონაწილემ განიხილა წარმატებული ადაპტაციები და ახალი პროექტები. განსაკუთრებული ინტერესი გამოიწვია კაროლინ ვალის წიგნის, „22 ბილიკის“ (22 Bahnen) განხილვამ. ამასთანავე, გაფართოებულმა აუდიოწიგნების სივრცემ (Frankfurt Audio Area) ასახა გლობალური აუდიობაზრის მზარდი პოპულარობა. Spotify-სა და Audible-ის სესიებმა დიდი გამოხმაურება ჰპოვა, ხოლო ცნობილმა ავტორებმა და მსახიობებმა, როგორებიც არიან რუფუს ბეკი და სებასტიან ფიცეკი, აუდიოწიგნებისა და პოდკასტების მოყვარულებთან ცოცხალი შეხვედრები გამართეს.
გამომცემლობა და ხელოვნური ინტელექტი: მომავლის გამოწვევები
„ადამიანი და/ან მანქანა?“ — ეს კითხვა ბაზრობაზე ყველა კუთხით განიხილებოდა: პრაქტიკული, ეთიკური და პოლიტიკური. დისკუსიები ხელოვნური ინტელექტის საგამომცემლო სფეროში ინტეგრაციაზე მეტწილად ოპტიმისტური და გადაწყვეტილებებზე ორიენტირებული იყო. ინოვაციების სცენაზე განიხილეს ლიცენზირების ახალი მოდელები და სამუშაო პროცესების ეფექტიანობის გაზრდის გზები. ამავდროულად, გაეროს გლობალური კომუნიკაციების დეპარტამენტის ხელმძღვანელმა, მელისა ფლემინგმა, დასვა კითხვა: „ვინ აკონტროლებს რეალობას?“ და გააფრთხილა საზოგადოება ალგორითმების მანიპულაციის გზით ნარატივების დამახინჯების საფრთხეების შესახებ.
საპატიო სტუმარი ფილიპინები: შთამბეჭდავი წარდგენა
2025 წლის საპატიო სტუმარმა, ფილიპინებმა, ფრანკფურტში თანამედროვე ლიტერატურის, ძირძველი თხრობის ტრადიციებისა და სოციალურ-პოლიტიკურ საკითხებზე მომუშავე მწერლებისა და ილუსტრატორების შემოქმედება წარმოადგინა. ფრანკფურტის ცენტრში გამართულმა ქუჩის ფესტივალმა „ჯიპნის მოგზაურობა“ (Jeepney Journey) 10,000-ზე მეტი ადამიანი მიიზიდა, სადაც სტუმრებს ფილიპინური კულტურის, მუსიკისა და სამზარეულოს გაცნობის შესაძლებლობა ჰქონდათ.
ბაზრობის დასასრულს, ფილიპინებმა საპატიო სტუმრის სიმბოლური გრაგნილი 2026 წლის სტუმარს, ჩეხეთის რესპუბლიკას გადასცა, რომელიც საკუთარ ლიტერატურასა და კულტურას სლოგანით „ჩეხეთი: ქვეყანა ზღვის სანაპიროზე“ წარადგენს.
ფრანკფურტის 78-ე წიგნის ბაზრობა 2026 წლის 7-11 ოქტომბერს გაიმართება.
