ქართულ სალიტერატურო ბაქანზე ახალი, ამბიციური გამომცემლობა „მატარებელი კომიქსი“ შემოდის, რომლის მიზანია გრაფიკული ლიტერატურის, გრაფიკული ჟურნალისტიკისა და კომიქს-კულტურის გამდიდრება. „მატარებელი“ მწერლისა და მთარგმნელის, მიხეილ ციხელაშვილის წამოწყებაა, რომლის სტრატეგიული და კრეატიული პარტნიორია ჰოლისტური დიზაინის კომპანია Holy Motors.
გამომცემლობა გეგმავს როგორც მსოფლიოში აღიარებული კომიქსების ქართულ ენაზე თარგმნას, ასევე – ქართველი არტისტების ორიგინალური ნამუშევრების გამოცემას, რითაც მიზნად ისახავს ქართულ საგამომცემლო ინდუსტრიაში ლიტერატურული თვალსაწიერის გაფართოებას.
ჩვენი მთავარი გამოწვევაა, გავამდიდროთ ქართველი მკითხველის ლიტერატურული ცნობიერება და შევცვალოთ დამოკიდებულება ჟანრისადმი. კომიქსი არ არის მხოლოდ მსუბუქი საკითხავი, ის კომპლექსური ისტორიების მოყოლის უნიკალური ფორმაა.
აცხადებს მიხეილ ციხელაშვილი, გამომცემლობის დამფუძნებელი.„მატარებელი კომიქსი“ საქმიანობას ორი მნიშვნელოვანი წიგნით იწყებს: გერმანელი ავტორის, მავილის, ევროპული ბესტსელერი „ქინდერლენდი“ და ქართველი ხელოვანის, მინდია არაბულის, ინოვაციური კომიქს-პოეზია „საუკუნო უკუნი“. ეს არჩევანი ხაზს უსვამს გამომცემლობის მრავალფეროვან და ხარისხზე ორიენტირებულ ხედვას.
ვიზუალური კულტურა ჩვენი პროფესიული საქმიანობის განუყრელი ნაწილია Holy Motors-ში. „მატარებელი“ იდეალურად ჯდება ჩვენს განზრახვაში, ვიმუშავოთ ბრენდებისა და საზოგადოების სასარგებლოდ, ვიზუალური კულტურის გასამდიდრებლად და არტისტებს შორის ახალი ხიდების ასაშენებლად.
ამბობს გიორგი ავალიანი, Holy Motors-ის წარმომადგენელი.
BookTok-ის სახელით, ვულოცავთ „მატარებელი კომიქსს“ წარმატებულ სტარტს და პირველი წიგნების გამოცემას! ჩვენ, როგორც წიგნის მოყვარულთა ციფრული საზოგადოება, უკვე დიდი ინტერესით ვეცნობით ამ ვიზუალურად შთამბეჭდავ ისტორიებს და გპირდებით, რომ სულ მალე ჩვენს მკითხველებს დეტალურ რეცენზიებსა და შთაბეჭდილებებს შევთავაზებთ. დარწმუნებულები ვართ, ეს „მატარებელი“ ქართულ ლიტერატურას ბევრ საინტერესო სადგურამდე მიიყვანს.
