HBO-ს მომავალ ტელესერიალში „ჰარი პოტერი“ ჯეიმზ პოტერის, ლილი პოტერისა და ჩარლი უიზლის როლების შემსრულებელი მსახიობები შეარჩიეს. როგორც The Hollywood Reporter-ი წერს, ჯასპერ ტალბოტი და ჰანა ჩინი ჯეიმზ და ლილი პოტერების როლებს მოირგებენ, ხოლო ჩარლი უიზლის პერსონაჟს ჰარი გილბი განასახიერებს. ცნობილი წიგნების ახალი სატელევიზიო ადაპტაციის პრემიერა 25 დეკემბერს შედგება.
პროექტში, რომელიც ჯ.კ. როულინგის წიგნებს ეფუძნება, მთავარ როლებს ახალბედა მსახიობები შეასრულებენ: ჰარი პოტერის როლს დომინიკ მაკლაფლინი მოირგებს, ჰერმიონ გრეინჯერს არაბელა სტანტონი განასახიერებს, რონ უიზლის კი – ალასტერ სტაუტი. ჰოგვორტსის მასწავლებელთა შემადგენლობაში ცნობილი მსახიობები არიან: ალბუს დამბლდორს ჯონ ლითგოუ ითამაშებს, მინერვა მაკგონაგელს – ჯანეტ მაკტირი, სევერუს სნეიპს – პააპა ესიედუ, ხოლო რუბეუს ჰაგრიდის სახეს ნიკ ფროსტი შექმნის.
უიზლების ოჯახის უფროსების, ართურისა და მოლის როლებს რეიფ სპოლი და ქეთრინ პარკინსონი შეასრულებენ. დერსლების სახლში ვერნონისა და პეტუნიას პერსონაჟებს დენიელ რიგბი და ბელ პაული განასახიერებენ. სერიალში ასევე გამოჩნდებიან რორი უილმოტი (ნევილ ლონგბოტომი), ლოქს პრატი (დრაკო მალფოი), ლუკ თალონი (კვირინუს კვირელი), უორვიკ დეივისი (ფილიუს ფლიტვიკი) და ბერტი კარველი (კორნელიუს ფაჯი).
გუნდმა უკვე დაიწყო მუშაობა მეორე სეზონზეც, რომელიც რომანს „ჰარი პოტერი და საიდუმლო ოთახი“ (Harry Potter and the Chamber of Secrets) ეფუძნება. ცნობილია, რომ მასში გილდეროი ლოკჰარტის როლს კიტ ჰარინგტონი შეასრულებს, ჯინი უიზლის – ბონი ჰილი, ელფ დობის – ლენი რაში, ტომ რიდლს კი – ბილი ბარეტი. მეორე სეზონში ასევე ითამაშებენ მოლი ჰიუიტ-რიჩარდსი (მტირალა მირტლი) და ჯასპერ ემბროუზი (კოლინ კრივი).
პროექტის სცენარისტი და აღმასრულებელი პროდიუსერი ფრანჩესკა გარდინერია, ხოლო მარკ მაილოდი რამდენიმე ეპიზოდის რეჟისორი და აღმასრულებელი პროდიუსერი იქნება. სერიალს HBO Brontë Film and TV-სთან და Warner Bros. Television-თან თანამშრომლობით ქმნის. აღმასრულებელ პროდიუსერებს შორის ასევე არიან ჯ.კ. როულინგი, ნილ ბლერი, რუთ კენლი-ლეტსი, დეივიდ ჰეიმანი, ლორა ნილი და ჯონ ბრაუნი.
წიგნი ხელმისაწვდომია uBooks.ge-ზეHarry Potter and the Philosopher’s Stone53,00 ₾ · მარაგშია
