კანდილის ისტორიის პრემია (Cundill History Prize) ბეთ ლიუ-უილიამსს წიგნისთვის „John Doe Chinaman: A Forgotten History of Chinese Life under American Racial Law“ გადაეცა. როგორც Publishing Perspectives-ი წერს, გამარჯვებულის ვინაობა 23 ოქტომბერს კანდილის ისტორიის პრემიის ფესტივალზე გამართულ საზეიმო ცერემონიაზე გამოაცხადეს. პრინსტონის უნივერსიტეტის პროფესორმა ჯილდოსთან ერთად 75 000 აშშ დოლარი მიიღო. გამარჯვებული ნაშრომი Harvard University Press-მა გამოსცა.
ბეთ ლიუ-უილიამსი პრინსტონის უნივერსიტეტის ისტორიის პროფესორი და ამავე უნივერსიტეტის აზიურ-ამერიკული კვლევების პროგრამის დირექტორია. მან 2021 წელს კიდევ ერთი ისტორიული კვლევა, „The Chinese Must Go: Violence, Exclusion, and the Making of the Alien in America“, გამოაქვეყნა.
წელს ჟიურიმ საუკეთესო წიგნი 400-ზე მეტი განაცხადიდან შერჩეული 15 ნაშრომისგან შემდგარი მოკლე სიიდან გამოავლინა. ფინალისტები გახდნენ ჯონათან ჩენგი წიგნით „Korean Messiah: Kim Il Sung and the Christian Roots of North Korea’s Personality Cult“ და ალექსანდერ ლი ნაშრომით „The First Ghetto: Venice and the Jews“. თითოეულ ფინალისტს 10 000 აშშ დოლარი ერგო.
კანდილის ისტორიის პრემია და ჟიურის გადაწყვეტილება
კანდილის ისტორიის პრემია, რომელსაც მაკგილის უნივერსიტეტი ადმინისტრირებს, ყველაზე მსხვილ ფულად ჯილდოს გასცემს ინგლისურენოვანი ან ინგლისურად ნათარგმნი დოკუმენტური პროზისთვის. კონკურსში მონაწილეობა შეუძლია ისტორიულ ნაშრომებს მთელი მსოფლიოდან, ავტორის ეროვნებისა და მოქალაქეობის განურჩევლად.
საკონკურსო ჟიურის თავმჯდომარე ჰარვარდის უნივერსიტეტის კლასიკური ფილოლოგიის პროფესორი ემილი გრინვუდი იყო. ჟიურის წევრმა, იელის უნივერსიტეტის ისტორიის პროფესორმა ნედ ბლეკჰოკმა გამარჯვებულ წიგნზე აღნიშნა:
დეტალური, დამაჯერებელი და მკაფიო თავდაჯერებულობით დაწერილი „John Doe Chinaman“ გამორჩეული მიღწევაა.
კანდილის ისტორიის პრემია წინა წლებში ლინდალ როუპერმა (2025 წელს) და ქეთლინ დიუვალმა (2024 წელს) მოიპოვეს.
