ლონდონის ლიტერატურული ფესტივალის მოწვეული კურატორი პოპვარსკვლავი დუა ლიპა გახდა. როგორც გამოცემა Infobae წერს, ბრიტანეთის დედაქალაქში გამართული მასშტაბური ღონისძიება 1 ნოემბერს დასრულდა. მომღერალმა ფესტივალის გახსნის უქმეებზე სცენაზე დისკუსიები გამართა მწერალ ზადი სმითთან, მუსიკოს მუსტაფასა და პატი სმითთან ერთად.
დუა ლიპა კულტურულ პლატფორმა Service95-ს ხელმძღვანელობს, რომელიც ყოველთვიური წიგნის კლუბს, ავტორებთან ინტერვიუებს, პოდკასტებსა და ვიდეომასალას მოიცავს. საუთბენკ-ცენტრის პერსელის დარბაზში პლატფორმამ თარგმნილი მხატვრული ლიტერატურის სესია წარადგინა, რომელშიც არგენტინელი მწერალი სამანტა შვებლინი მონაწილეობდა. შეხვედრას წამყვანი ჰოუპ ნდაბა უძღვებოდა.
ღონისძიების პროგრამა ასევე მოიცავდა 30 ოქტომბერს გამართულ პოეზიისა და მუსიკის საღამოს „Fierce Sounds“, შეხვედრებს მწერალ მალორი ბლექმენთან და ცენზურისა და სიტყვის თავისუფლებისადმი მიძღვნილ სესიებს ორგანიზაცია English PEN-თან ერთად. ფესტივალი 1 ნოემბერს დედოფალ ელიზაბეთის დარბაზში ჰანიფ კურეიშისა და მისი შვილის, კარლო კურეიშის შეხვედრით დაიხურა, რომელსაც ჟურნალისტი ემა ბარნეტი უძღვებოდა Service95-ის წიგნის კლუბთან თანამშრომლობით.
დუა ლიპას ლიტერატურულმა რეკომენდაციებმა ბოლო წლებში წიგნის გაყიდვებზე დიდი გავლენა მოახდინა. მიშელ ზონერის წიგნის, „Crying in H Mart“-ის გაყიდვები მომღერლის წიგნის კლუბში მოხვედრიდან ერთ კვირაში 53%-ით გაიზარდა, ხოლო ჰანია იანაგიჰარას რომანზე, „A Little Life“, 2020 წელს ლიპას გამოქვეყნებულმა პოსტმა გაყიდვები ოთხჯერ გაზარდა. მის პლატფორმაზე მანამდე ისეთი ავტორები გამოჩნდნენ, როგორებიც არიან მარგარეტ ეტვუდი, ჯორჯ სონდერსი, პერსივალ ევერეტი და კაზუო იშიგურო.
მომღერლის კურატორობა საუთბენკ-ცენტრის 75 წლის იუბილესა და გაერთიანებულ სამეფოში გამოცხადებული კითხვის ეროვნულ წელს დაემთხვა. National Literacy Trust-ის მონაცემებით, ბრიტანელ არასრულწლოვნებში კითხვით მიღებული სიამოვნების მაჩვენებელი 2025 წელს 32,7%-მდე შემცირდა. 1995 წელს ლონდონში, კოსოვოელ ალბანელთა ოჯახში დაბადებული პოპვარსკვლავი Instagram-ზე 88 მილიონზე მეტ გამომწერს აერთიანებს და ახალგაზრდა თაობაში კითხვის პოპულარიზაციას განაგრძობს.
