ოდრი ნიფენეგერმა სადებიუტო რომანის, „The Time Traveler’s Wife“-ის გაგრძელება დაწერა, რომელზეც 14 წლის განმავლობაში მუშაობდა. როგორც The Guardian-ი წერს, ავტორმა ახალ წიგნზე „Life Out of Order“ მუშაობა 2012 წელს დაიწყო, მის გამოცემას კი Jonathan Cape-ი გეგმავს.
რომანი ჰენრისა და კლერის შვილის, ალბას შესახებ მოგვითხრობს, რომელიც დროში მოგზაურობის უნარს პირადი და პოლიტიკური მიზნებისთვის იყენებს. ხანგრძლივ სამუშაო პროცესზე ოდრი ნიფენეგერმა თქვა:
ერთსა და იმავე საქმეზე 14 წლის დახარჯვის შემდეგ, ბედნიერი ვარ, რომ ცოტათი დავისვენებ.
გლობალური პოპულარობა და ადაპტაციები
„The Time Traveler’s Wife“ 2003 წელს გამომცემლობა MacAdam/Cage-მა გამოსცა. წიგნის გაყიდვებმა გლობალურად 9 მილიონ ეგზემპლარს გადააჭარბა. რომანის მიხედვით 2009 წელს გადაიღეს ფილმი, რომელშიც რეიჩელ მაკადამზი მონაწილეობს, ხოლო 2022 წელს HBO-მ ამავე სახელწოდების ტელესერიალი შექმნა.
2009 წელს გამოცემული კიდევ ერთი წიგნისთვის, „Her Fearful Symmetry“, მწერალმა ავანსად 5 მილიონი დოლარი მიიღო. ოდრი ნიფენეგერი მკითხველებს 2026 წლის 28 ოქტომბერს ლონდონში, კონუეი ჰოლში შეხვდება, სადაც სტივენ მოფატს გაესაუბრება.
ოდრი ნიფენეგერი და ახალი კინოპროექტი
კიდევ ერთი სიახლე მწერლის ილუსტრირებულ რომანს, „Three Incestuous Sisters“-ს უკავშირდება. წიგნის მიხედვით მუნჯ ფილმს იღებენ, რომლის რეჟისორიც ალიჩე რორვახერია. სცენარის თანაავტორი ოტესა მოშფეგია. პროექტში მსახიობები: დაკოტა ჯონსონი, სირშა რონანი და ჯესი ბაკლი მონაწილეობენ.
