სარა მაკლინის 2025 წლის რომანის, „These Summer Storms“-ის, მიხედვით დრამატული ტელესერიალი შეიქმნება. როგორც გამოცემა Deadline-ი წერს, პროექტზე სტრიმინგ პლატფორმა Hulu და სტუდია 20th Television-ი მუშაობენ. სატელევიზიო ადაპტაციის სცენარს მელანი მარნიჩი დაწერს.
დრამატული სერიალის აღმასრულებელი პროდიუსერები ერინ ფოსტერი და სარა ფოსტერი იქნებიან. დების საპროდიუსერო კომპანიას, Fatigue Sisters-ს, 20th Television-თან საერთო ხელშეკრულება აკავშირებს. აღმასრულებელ პროდიუსერთა გუნდში ასევე შედიან თავად მელანი მარნიჩი, მონტანა მაკბერნი, ოლი ობსტი და რომანის ავტორი სარა მაკლინი.
სიუჟეტის ცენტრშია ელის სტორმი, რომელიც მამის მოულოდნელი გარდაცვალების შემდეგ როუდ-აილენდში მდებარე ოჯახის კერძო კუნძულზე ბრუნდება.
დაგეგმილ სერიალზე საუბრისას სარა მაკლინმა აღნიშნა:
აღფრთოვანებული ვარ, რომ დებ ფოსტერებთან, 20th Television-თან და Hulu-სთან ერთად ვიმუშავებ, რათა „These Summer Storms“-ის ეკრანიზაცია შედგეს.
სცენარისტ მელანი მარნიჩს სატელევიზიო სივრცეში მუშაობის დიდი გამოცდილება აქვს. ის მანამდე ლიან მორიარტის წიგნის მიხედვით შექმნილი Peacock-ის მინისერიალის, „Apples Never Fall“-ის, შოურანერი და აღმასრულებელი პროდიუსერი იყო. მარნიჩი ასევე მუშაობდა FX-ის მინისერიალზე „A Murder at the End of the World“, როგორც აღმასრულებელი პროდიუსერი.
ერინ ფოსტერმა სერიალი „Nobody Wants This“ შექმნა, რომლის აღმასრულებელი პროდიუსერიც სარა ფოსტერთან ერთად იყო. ამ შოუს მესამე სეზონი Netflix-ზე გამოდის.
სარა მაკლინის სხვა რომანებს შორისაა „Bombshell“ და „Wicked and the Wallflower“. ავტორის წიგნები მსოფლიოს 30-ზე მეტ ენაზეა ნათარგმნი.
