წიგნებისა და მოთხრობების რამდენიმე ახალი ეკრანიზაცია წარმოების სხვადასხვა ეტაპზე გადავიდა. კინოსტუდიებმა და სტრიმინგ პლატფორმებმა ცნობილი ავტორების რომანებისა თუ მოთხრობების ადაპტირების შესახებ ახალი დეტალები გაავრცელეს.
„In A Holidaze“ – კრისტინა ლორენი
რომანტიკული კომედია საშობაო დროის მარყუჟში მომწყვდეული ახალგაზრდა ქალის უცნაურ თავგადასავალზე მოგვითხრობს. ფილმის სცენარის ავტორი და რეჟისორი ტიფანი პოლსენია, მთავარ როლს კი მედი ზიგლერი ასრულებს. ნაწარმოები კრისტინა ჰობსისა და ლორენ ბილინგსის საერთო ფსევდონიმით, კრისტინა ლორენის სახელით გამოცემულ რომანს ეფუძნება. სადღესასწაულო ფილმს 2 დეკემბრიდან Netflix-ი ექსკლუზიურად შესთავაზებს მაყურებელს.
„A Long Winter“ – კოლმ ტოიბინი
კოლმ ტოიბინის ამავე სახელწოდების მოთხრობის ეკრანიზაციაზე რეჟისორმა ენდრიუ ჰეიგმა იმუშავა, რომელმაც ფილმის სცენარიც თავად მოამზადა. სიუჟეტი XX საუკუნის 50-იანი წლების კოლორადოს მთებში ვითარდება. სამსახიობო შემადგენლობაში ფრედ ჰეჩინგერი, ებონ მოს-ბაკრაკი, კატრიონა ბალფი, კიტ კონორი და დ’ფარო ვუნ-ა-ტაი შედიან. გამოცემა Deadline-ის ცნობით, პროექტი Mubi-მ და Film4-მა დააფინანსეს, ხოლო კინოთეატრებში პრემიერა იანვარსა და თებერვალში შედგება.
„The Bell Jar“ – სილვია პლათი
სილვია პლათის რომანის ახალი კინოადაპტაციის გადაღებები რეჟისორმა სარა პოლიმ ცოტა ხნის წინ დაასრულა. ფილმში მთავარ როლს ბილი აილიში ასრულებს, რაც მუსიკოსისთვის კინოში სადებიუტო მთავარი სამსახიობო ნამუშევარი იქნება. ჟურნალ Variety-სთან საუბრისას კომპოზიტორმა ჰილდურ გუდნადოტირმა დაადასტურა, რომ ფილმის მუსიკას თავად წერს. მან აღნიშნა:
ეს ერთ-ერთი ყველაზე ამაღელვებელი პროექტია, რომელზეც კი მიმუშავია. მე და სარა კარგი მეგობრები ვართ, ამიტომ მასთან ერთად ამ ამბის მოყოლა საოცარია.
„The Hole“ – ჰიე-იონგ პიონი
ჰიე-იონგ პიონის 2016 წლის კორეულენოვანი რომანი სამხრეთ კორეაში მცხოვრები ამერიკელი პროფესორის შესახებ მოგვითხრობს, რომელზეც ავარიაში ცოლის დაღუპვის შემდეგ სიდედრი ზრუნავს და ამ პროცესში მძიმე საიდუმლოებები ვლინდება. ფილმის რეჟისორი კიმ ჯი-ვუნია, სცენარი კი კრისტოფერ ჩენმა დაწერა. მთავარ როლებს თეო ჯეიმზი, ჰოიონი, იომ ჰიე-რანი და კრისტიან სლეიტერი ასრულებენ. როგორც The Hollywood Reporter-ი წერს, სტუდია Orion Pictures-ი ფილმის კინოგაქირავებაში გამოშვებას 2027 წლის 25 ივნისს გეგმავს.
„Black Girl, Jump“ – შარლინ ტომასი
შარლინ ტომასის თინეიჯერული საშინელებათა რომანის სიუჟეტის ცენტრშია კოსმეტიკური საშუალება, რომელიც გოგონებს განსაკუთრებულ ბზინვარებას ანიჭებს, და განმარტოებული თავშეყრის ადგილი, სადაც მთავარი პერსონაჟი, ბრინი, მდუღარე მდინარეს აღმოაჩენს. ნაწარმოების სატელევიზიო უფლებები ეშლი ბლეინ ფეზერსონ-ჯენკინსმა და კრისტინა ელმორმა საკუთარი კომპანიისთვის, Tomorrow/Today-სთვის შეიძინეს. რომანს გამომცემლობა Dutton-ი 2027 წლის 8 ივნისს გამოსცემს.
„The Best Of“ – გრემ სიმსიონი
გრემ სიმსიონის რომანი ორ ყოფილ შეყვარებულზე მოგვითხრობს, რომლებიც ათწლეულების შემდეგ ერთმანეთს კვლავ ხვდებიან, რასაც რთული ემოციური შედეგები მოჰყვება. წიგნის კინოადაპტაცია მსახიობ ტონი კოლეტის სარეჟისორო დებიუტი გახდება, პროდიუსერებად კი კოლეტი და კრისტოფერ საიმონი მუშაობენ. ფილმი Screen Australia-მ დააფინანსა, რომელმაც მხარი ასევე დაუჭირა სარა ბეილის, ბეჰრუზ ბუჩანისა და გებრიელ ბერგმოსერის წიგნებისა და მემუარების ადაპტაციებს.
