ტელეკომპანია USA Network-მა სერიალი „Anna Pigeon“ მეორე სეზონით გააგრძელა. შოუ ამერიკელი ავტორის, ნევადა ბარის ამავე სახელწოდების დეტექტიური წიგნების სერიის ადაპტაციაა. როგორც Variety წერს, არხმა პროექტის გაგრძელების გადაწყვეტილება პირველი სეზონის ფინალამდე მიიღო. სერიალის პრემიერა 7 აგვისტოს შედგა, ფინალური ეპიზოდი კი 9 ოქტომბერს გავა ეთერში.
ეკრანიზაციაში მთავარ როლს ტრეისი სპირიდაკოსი ასრულებს. ის ანა პიჯონს განასახიერებს – წარსულში ტიპურ ქალაქელს, რომელმაც ცხოვრების წესი რადიკალურად შეცვალა, ეროვნულ პარკში რეინჯერად დაიწყო მუშაობა და მის ტერიტორიაზე მომხდარ დანაშაულებს იძიებს.
სერიალის შოურანერი და აღმასრულებელი პროდიუსერი მორუინ ბრებნერია. მასთან ერთად მუშაობს ლეა ტომპსონი, რომელიც სერიალის რეჟისორი და აღმასრულებელი პროდიუსერია. მეორე სეზონის დაანონსებისას მორუინ ბრებნერმა აღნიშნა:
მადლობას ვუხდით მსახიობებსა და გადამღებ ჯგუფს, რომლებმაც ნევადა ბარის საკულტო სამყარო მთელი გულით გააცოცხლეს…
სერიალს USA Network-ისთვის კომპანიები Cineflix-ი და SEVEN24 Films-ი Bell Media-სთან თანამშრომლობით აწარმოებენ. ამერიკის შეერთებული შტატების გარეთ დისტრიბუციაზე Cineflix Rights-ი ზრუნავს.
გარდა ამისა, 2026 წლის დასაწყისში კორპორაცია Comcast-მა USA Network-ი გამოყო და დამოუკიდებელ კომპანია Versant-ად ჩამოაყალიბა.
