8 ოქტომბერს ფრანკფურტის წიგნის ბაზრობის მეორე სამუშაო დღეს ინდუსტრიის პროფესიონალებმა პანელური დისკუსიები გამართეს. პროფესიული პროგრამა, Publishing Perspectives-ის ცნობით, რამდენიმე სცენაზე პარალელურად წარიმართა და ისეთ საკითხებს დაეთმო, როგორებიცაა საგამომცემლო თავისუფლება, ხელოვნური ინტელექტი, დემოკრატიის დაცვა და ციფრული ბიბლიოთეკების ზრდა.
გამომცემელთა საერთაშორისო ასოციაციამ (IPA) სპეციალური ანგარიში წარადგინა, რომელიც გლობალური მასშტაბით საგამომცემლო თავისუფლების მდგომარეობასა და ინდუსტრიული შეზღუდვების საპასუხო ქმედებებს აფასებს.
პარალელურად, დეზინფორმაციისა და დემოკრატიის დაცვის საკითხებზე გამართულ პანელურ დისკუსიაში გაერთიანებული ერების ორგანიზაციის გენერალური მდივნის მოადგილემ, მელისა ფლემინგმა და ფესტივალის დირექტორმა, იულია კოზლოვეცმა მონაწილეობა მიიღეს.
Young Voices Network-მა მსოფლიოს სხვადასხვა ქვეყნის ახალგაზრდა მწერლებსა და ხელოვანებს უმასპინძლა. მათი დისკუსია საგანგებო ღონისძიებით, FBM Young Voices Night-ით დასრულდა.
ფრანკფურტის წიგნის ბაზრობა: ციფრული ტენდენციები
ინდუსტრიის სპეციალისტებმა ვრცლად ისაუბრეს იმაზე, თუ რა გამოწვევებს უქმნის ხელოვნური ინტელექტის განვითარება ტრადიციულ საგამომცემლო მოდელებს. მომხსენებლებმა ეს საკითხი როგორც კომერციული, ისე სამეცნიერო სფეროს პერსპექტივიდან შეაფასეს.
ციფრული ფორმატების მიმართულებით, პანელისტებმა საჯარო ბიბლიოთეკების ბაზარზე არსებული შესაძლებლობები და გამოწვევები განიხილეს. მათ ყურადღება ელექტრონულ წიგნებზე, აუდიოწიგნებსა და ციფრულ ლიცენზირებაზე გაამახვილეს.
აუდიოწიგნების სექტორის ანალიზისას, კომპანია Audible-მა ბაზრობის მიმდინარეობისას ახალი საერთაშორისო გამოკითხვის შედეგების გამოქვეყნება დაგეგმა, რომელიც აუდიოწიგნების მოსმენის ტენდენციებს ეხება. პლატფორმა BookBeat-მა კი ევროპული აუდიოწიგნების მოხმარების, შემოსავლების გენერირებისა და მომხმარებელთა ქცევის შესახებ პრეზენტაცია გამართა. მათი კვლევა 1,4 მილიარდზე მეტი საათის მოსმენის მონაცემებს დაეფუძნა.
ღონისძიებაზე კიდევ ერთი მნიშვნელოვანი პრეზენტაცია NielsenIQ BookData-მ წარადგინა. კომპანიამ ბრაზილიის წიგნის ბაზრის პირველი ეროვნული კვლევის შედეგები გააზიარა, რომელიც მკითხველთა დემოგრაფიულ მონაცემებსა და მათ ჩვევებს აანალიზებს.
