მსოფლიო ფენტეზის პრემიის (World Fantasy Award) წლევანდელი გამარჯვებულები კალიფორნიის ქალაქ ოუკლენდში, მსოფლიო ფენტეზის კონვენციაზე დაასახელეს. როგორც გამოცემა Locus-ი წერს, საზეიმო ცერემონია 25 ოქტომბერს გაიმართა. წლის საუკეთესო რომანის ნომინაციაში მთავარი ჯილდო მ. რ. კერის წიგნმა „Once Was Willem“ დაიმსახურა, რომელიც ორმა გამომცემლობამ, Orbit US-მა და Orbit UK-მ გამოსცა.
რომანის კატეგორიაში გამარჯვებისთვის კიდევ ოთხი ავტორი იბრძოდა: მარტინ კეჰილი, ჯოვანი დე ფეო, პეტ მერფი და ალიქს ე. ჰაროუ. საუკეთესო ნოველის ნომინაციაში პრემია იდენ როისს ერგო ნაწარმოებისთვის „Psychopomp & Circumstance“, რომელიც გამომცემლობა Tordotcom-მა გამოსცა. ამავე კატეგორიის ფინალისტებს შორის იყვნენ თეოდორა გოსი, ტომას ჰა, ჯორდან კურელა, ჯოშ მალერმანი, ნგი ვო და ამალ ელ-მოჰთარი.
მოკლე მხატვრული პროზის ნომინაციაში ჟიურიმ რენან ბერნარდო Reactor-ში გამოქვეყნებული მოთხრობისთვის გამოარჩია. საუკეთესო მხატვრის კატეგორიაში კი წლევანდელი ჯილდო ქეთლინ ჯენინგსს ერგო.
მსოფლიო ფენტეზის პრემია ანთოლოგიებისა და კრებულებისთვის
საავტორო კრებულის კატეგორიაში ტომას ჰას წიგნმა „Uncertain Sons and Other Stories“ გაიმარჯვა, რომელიც გამომცემლობა Undertow-მ გამოსცა. ამ ნომინაციის ფინალისტებს შორის იყვნენ თეოდორა გოსი, კ. ა. ტერინა (ალექს შვარცმანის თარგმანით) და სალმან რუშდი.
ანთოლოგიის ნომინაციაში პირველობა წილად ხვდა კრებულს „Storyteller: A Tanith Lee Tribute Anthology“, რომელიც რედაქტორებმა – ჟიული ს. დეიმ, კარინა ბისეტმა და კრეიგ ლორენს გიდნიმ – მოამზადეს. ჟიურის მოკლე სიაში ასევე წარმოდგენილი იყო ელენ დატლოუს, მაიკლ კელის, სტივენ კოტოვიჩისა და ჰოლი სტარლინგის შედგენილი ანთოლოგიები.
კონვენციაზე პროფესიული და არაპროფესიული სპეციალური ჯილდოებიც გასცეს. სპეციალური პროფესიული ჯილდო (Special Award – Professional) Tachyon Publications-ის საქმიანობისთვის ჯეიმი გოს, ჯილ რობერტსსა და ჯეიკობ ვაისმანს გადაეცა. არაპროფესიული სპეციალური ჯილდო (Special Award – Non-Professional) კი ჟურნალ Nightmare-ის რედაქტორმა ვენდი ვაგნერმა დაიმსახურა.
მსოფლიო ფენტეზის პრემიის საპატიო ჯილდო ცხოვრებისეული მიღწევებისთვის (Life Achievement Award) მწერლებს, კლაივ ბარკერსა და ჯოის კეროლ ოუტსს, გადაეცა. წლევანდელი საკონკურსო ნამუშევრები ჟიურიმ შეაფასა, რომლის შემადგენლობაშიც ჩიკოდილი ემელუმადუ, ტემსინ მიური, მადლენ ე. რობინსი, რიჩარდ ტომასი და ენ ვანდერმეერი შედიოდნენ.
