წელს, იანვრიდან სექტემბრის ჩათვლით, იტალიაში კომიქსების გაყიდვები 14,9%-ით გაიზარდა და 68,3 მილიონ ევროს მიაღწია. გამოცემა ActuaLitté-ის ცნობით, ამ ცხრა თვეში მკითხველებმა დაახლოებით 7,1 მილიონი ეგზემპლარი შეიძინეს, რაც 2025 წლის იმავე პერიოდთან შედარებით 12,4%-იან მატებას აჩვენებს.
ამ მაჩვენებლით კომიქსების სექტორმა ქვეყნის მთლიანი წიგნის ბაზრის ზრდის ტემპს გადაუსწრო, რომელმაც მხოლოდ 3,2% შეადგინა. ამასთანავე, კომიქსებმა უკან ჩამოიტოვა საბავშვო ლიტერატურა, უცხოური მხატვრული პროზა და ადგილობრივი იტალიური მხატვრული ლიტერატურაც. გამოკვლეულ საცალო არხებში გაყიდული ფიზიკური წიგნების საერთო რაოდენობის 10,1% და ბაზრის საერთო ღირებულების 6,7% სწორედ კომიქსებზე მოდის.
ეს სტატისტიკური მონაცემები იტალიის გამომცემელთა ასოციაციამ (AIE) 28 ოქტომბერს, ქალაქ ლუკაში გამართულ ფესტივალზე Lucca Comics & Games წარადგინა. პანდემიამდელ, 2019 წლის მონაცემებთან შედარებით, როდესაც შემოსავალი 20,1 მილიონი ევრო იყო, გაყიდული ტირაჟი კი 2,1 მილიონ ეგზემპლარს შეადგენდა, მკითხველთა დახარჯული თანხა 239,4%-ით გაიზარდა, ხოლო გაყიდული წიგნების რაოდენობა – 229,3%-ით.
როგორ ნაწილდება კომიქსების გაყიდვები სექტორში
ჟანრებს შორის ყველაზე სწრაფი ტემპით გრაფიკული რომანების მიმართულება გაფართოვდა. ამ სეგმენტის შემოსავალი 34,8%-ით გაიზარდა, ხოლო გაყიდული ეგზემპლარების რაოდენობამ 38,4%-ით მოიმატა. შედეგად, გრაფიკულ რომანებზე ახლა კომიქსების მთლიანი სექტორის შემოსავლის 23,3% მოდის.
ბაზრის უპირობო ლიდერად კვლავ მანგა რჩება, რომელზეც დახარჯული თანხის 55,2% და შეძენილი ეგზემპლარების 73% მოდის. ამასთან, მანგის ღირებულებითი მოცულობა წელს 11,7%-ით გაიზარდა.
ამ ფონზე, საცალო ფასები სხვადასხვა სეგმენტში არაერთგვაროვნად შეიცვალა. მანგის საშუალო ფასმა 7,32 ევრომდე მოიმატა, მაშინ, როდესაც გრაფიკული რომანების საშუალო ღირებულება 18,23 ევრომდე შემცირდა. საბავშვო გამოცემების ფასი თითქმის არ შეცვლილა და 14,07 ევრო შეადგინა. აქვე აღსანიშნავია, რომ 2025 წელს იტალიელმა გამომცემლებმა 3339 ახალი კომიქსი გამოუშვეს, რაც 2024 წელთან შედარებით 4,4%-ით ნაკლები იყო.
შემოსავალი დამოუკიდებელ წიგნის მაღაზიებშიც საგრძნობლად გაიზარდა – წლის პირველ ნახევარში კომიქსების გაყიდვებმა 36%-ით მოიმატა და ოთხ მილიონ ევროს მიაღწია. მაღაზიების გაყიდვებზე არსებითი გავლენა მოახდინა საჯარო ბიბლიოთეკების შესყიდვების 60-მილიონიანმა ფონდმა. ამ მხარდაჭერის წყალობით, იანვრიდან აპრილამდე წიგნის მაღაზიებმა დაახლოებით 35 მილიონი ევროს შემოსავალი მიიღეს.
AIE-ის წარმომადგენელმა ემანუელე დი ჯორჯიმ განაცხადა:
ჩვენ მთავრობას ვთხოვთ, მომდევნო წლებისთვისაც დაადასტუროს და შეინარჩუნოს ბიბლიოთეკების დაფინანსება.
წარმოდგენილი ანგარიში კომპანია NielsenIQ BookData-ს მონაცემებს ეყრდნობა. ეს კვლევა არ მოიცავს ციფრულ გაყიდვებს, წიგნის ფესტივალების სტენდებს, პრესის ჯიხურებსა და ქვეყანაში მოქმედ დაახლოებით 400 კომიქსების სპეციალიზებულ მაღაზიას.
