ბეირუთის წიგნის ბაზრობა ისტორიული თანამშრომლობის შეთანხმებით გაიხსნა და 18 ოქტომბრამდე გაგრძელდება. როგორც Publishing Perspectives-ი წერს, 67-ე საერთაშორისო ღონისძიებამ ერთ ჭერქვეშ გააერთიანა არაბული კულტურის კლუბი, ლიბანის გამომცემელთა ასოციაცია და ბეირუთის ფრანკოფონული წიგნის ბაზრობა. ამ ორგანიზაციებმა ხანგრძლივი უთანხმოება მოაგვარეს და მომავალი ბაზრობების მონაცვლეობით ორგანიზებაზე შეთანხმდნენ. მოლაპარაკებებს რამდენიმე თვის განმავლობაში ლიბანის კულტურის მინისტრი ღასან სალამე უძღვებოდა. ფრანკოფონული გამოფენა, რომელიც 2018 წლამდე 25 წლის განმავლობაში დამოუკიდებლად იმართებოდა, წელს საერთო პროგრამას შეუერთდა.
ბეირუთის წიგნის ბაზრობა აღდგენილ ტერიტორიაზე ტარდება
არაბული წიგნის ბაზრობა 1956 წელს დაარსდა და მას ორგანიზებას თავიდანვე არაბული კულტურის კლუბი უწევს. წელს გამოფენა ბეირუთის პორტთან ახლოს, 2020 წლის აფეთქების შემდეგ ორი წლის განმავლობაში აღდგენილ ტერიტორიაზე იმართება. ორგანიზატორები გეგმავენ, რომ 2027 წელს ბაზრობა ტრადიციულ დეკემბრის კალენდარს დაუბრუნდეს.
წლევანდელი პროგრამა 108 სადისკუსიო პანელს მოიცავს. შეხვედრები ისტორიას, მეხსიერებას, პოეზიას, მემკვიდრეობას, პოლიტიკას, ხელოვნებას, ეკონომიკასა და თეატრს ეხება. ფესტივალში 140 ლიბანელი გამომცემელი და 23 არაბული საგამომცემლო სახლი მონაწილეობს ეგვიპტიდან, იორდანიიდან, სირიიდან, არაბთა გაერთიანებული საამიროებიდან და საუდის არაბეთიდან. ამავდროულად, Institut français-ი წარადგენს პროგრამას „Beyrouth Livres“, რომელსაც ცხრა ქვეყნიდან 40 ავტორი, ილუსტრატორი და ხელოვანი ჩამოჰყავს. Institut français-ი სტენდს კვლევით ინსტიტუტ Institut français du Proche-Orient-თან და მაროკოელ თუ ტუნისელ გამომცემლებთან იყოფს.
გავლენიანი ლიბანური გამომცემლობა Dar Al Adab-ი, რომელიც 1956 წელს მემარცხენე ინტელექტუალმა და მწერალმა სუჰეილ იდრისმა ჟურნალის სახით დააფუძნა, 70 წლის იუბილეს აღნიშნავს. საგამომცემლო სახლი რვა დისკუსიას უძღვება და სულ მცირე ექვს არაბ ავტორს მასპინძლობს. გამომცემლობის დირექტორი რანა იდრისი და მთარგმნელი სტეფანი დიუჟოლი პალესტინელი ავტორის, ნასერ აბუ სრურის ციხის მემუარს, „The Tale of a Wall“-ს განიხილავენ. დიუჟოლის ფრანგულმა თარგმანმა რამდენიმე ჯილდო დაიმსახურა, მათ შორის არაბული ლიტერატურის პრემია (Prix de la littérature arabe) 2025 წელს.
კულტურული მოვლენა რთულ ვითარებაში იმართება – ისრაელის დაბომბვებმა ბეირუთის სამხრეთ გარეუბნებში ლიბანური საგამომცემლო საწყობები და ინფრასტრუქტურა დააზიანა. შექმნილ ვითარებაზე სალვა სინიორა ბაასირმა აღნიშნა:
კულტურა ფუფუნება არ არის. კულტურა ქმნის ცნობიერებას და რთულ დროს ჩვენ სწორედ მას ვეყრდნობით.
პარალელურად, ლიბანის კულტურის სამინისტრომ გაეროს განათლების, მეცნიერებისა და კულტურის ორგანიზაციასთან (UNESCO) თანამშრომლობით პროექტი დაიწყო, რომლის პირველი ეტაპიც მსხვილი ქალაქების მიღმა მდებარე 15 საჯარო ბიბლიოთეკას დაეხმარება.
