კინორეჟისორი ტიმ ბარტონი და ნობელის პრემიის ლაურეატი მწერალი კაზუო იშიგურო ახალ სრულმეტრაჟიან მხატვრულ ფილმზე მუშაობენ. გამოცემა Deadline-ის ინფორმაციით, ბარტონი უსათაურო პროექტის რეჟისორი იქნება, ხოლო სცენარი იშიგუროს ორიგინალურ ამბავს დაეფუძნება. სიუჟეტი მეორე მსოფლიო ომის შემდგომ იაპონიაში ვითარდება და ავტორის არცერთ არსებულ თუ მომავალ რომანს არ უკავშირდება.
ახალი კინოპროექტის შესახებ ინფორმაცია თავად კაზუო იშიგურომ დაადასტურა. მწერალმა ამ სიახლეზე თავისი წიგნის, „კლარა და მზის“ (Klara and the Sun), ეკრანიზაციის მსოფლიო პრემიერაზე ისაუბრა, რომელსაც ლონდონის კინოფესტივალმა უმასპინძლა. ეს სურათი ტაიკა ვაიტიტიმ გადაიღო, მთავარი როლი კი ჯენა ორტეგამ შეასრულა. ორტეგას ბარტონის პროექტებზეც უმუშავია: მსახიობი მთავარ გმირს განასახიერებს მის პოპულარულ სერიალში „Wednesday“, რომლის მესამე სეზონზე მუშაობაც რეჟისორმა ახლახან დაასრულა.
მეორე მსოფლიო ომის შემდგომი პერიოდის ფილმს ახლა დისტრიბუტორი არ ჰყავს. ბარტონისა და იშიგუროს გარდა, პროექტში მსახიობები ან შემოქმედებითი ჯგუფის სხვა წევრები ჯერ არ მონაწილეობენ, შემქმნელები კი ბაზარზე მყიდველების მოძიებას გუნდის დაკომპლექტების შემდეგ დაიწყებენ. რომან „არ გამიშვას“ (Never Let Me Go) ავტორი კინოში პირველ ნაბიჯებს არ დგამს. ლიტერატურის დარგში ნობელის პრემიის ლაურეატს სცენარისტის გამოცდილება უკვე აქვს: სწორედ იშიგუროს ეკუთვნის ფილმ „Living“-ის სცენარი, სადაც მთავარი როლი ბილ ნაიმ შეასრულა.
