ტაიკა ვაიტიტის ახალი ფილმის, „Klara and the Sun“-ის საუნდტრეკში ჯგუფ Violent Femmes-ის სიმღერა და ფრედერიკ შოპენის ნაწარმოებები შევიდა. ამის შესახებ გამოცემა Deadline-ი წერს და კაზუო იშიგუროს რომანის ეკრანიზაციის მუსიკალურ სიასთან ერთად მსახიობთა შემადგენლობის ახალ დეტალებსაც აქვეყნებს.
ფილმში მთავარ როლს ჯენა ორტეგა ასრულებს. ის რობოტ კლარას, ეგრეთ წოდებულ ხელოვნურ მეგობარს განასახიერებს. სიუჟეტის მიხედვით, კლარა მაღაზია „Friend Store“-ში ელოდება დღეს, როცა მას ვინმე შეიძენს, სანამ გოგონა, სახელად ჯოზი შეარჩევს. ჯოზის როლს მია თარია ასრულებს, მისი დედის, კრისის როლში კი ემი ადამსია.
კრისი კლარას შეძენას თავდაპირველად ერიდება, რადგან მაღაზია „Fancy Friends“-ის მოდელებთან შედარებით ის უფრო ძველი გამოშვებაა. თავად ჯოზი გენეტიკურად გაუმჯობესებულია, თუმცა მძიმე სენით იტანჯება. ფილმის მეორეხარისხოვან როლებს ნატაშა ლიონი, არან მერფი, სტივ ბუშემი და რეიჩელ ჰაუსი ასრულებენ.
ფილმის მუსიკალური გაფორმება ჟანრობრივად მრავალფეროვანია. კლასიკური რეპერტუარიდან საუნდტრეკში ფრედერიკ შოპენისა და ანტონიო ვივალდის ნაწარმოებები შევიდა. ამასთან, მაყურებელი მოისმენს ჯგუფ Violent Femmes-ის კომპოზიციას „Good Feeling“ და ჯგუფ Television-ის სიმღერას „Days“. ფილმში ასევე გაისმის ლესლი გორის შესრულებული სიმღერა „Sunshine Lollipops and Rainbows“, რომლის ავტორებიც მარვინ ჰამლიში და ჰოვარდ ლიბლინგი არიან.
მუსიკალურ სიაში ასევე შევიდა ისეთი შემსრულებლების სიმღერები, როგორებიც არიან ოუენ ჩეიმი, DecadeZ-ი, Disasteradio, სტომუ იამაშტა და ANOHNI and the Johnsons-ი. პარალელურად, რეჟისორი ტიმ ბარტონი და კაზუო იშიგურო ერთობლივ საიდუმლო პროექტზეც მუშაობენ.
