OpenAI-ს საავტორო დავაში, რომელიც აშშ-ის სასამართლოში მიმდინარეობს, სასამართლოს მეგობრის 51 დასკვნა წარადგინეს. როგორც Publishing Perspectives-ი წერს, საქმეზე In re OpenAI Copyright Infringement Litigation თავიანთი არგუმენტები შემოქმედებითმა გაერთიანებებმა, ტექნოლოგიურმა კომპანიებმა, მეცნიერებმა და კანონმდებლებმა წარმოადგინეს. ეს მასშტაბური პროცესი ათზე მეტ დამოუკიდებელ საჩივარს აერთიანებს, მათ შორის ავტორთა გილდიისა და The New York Times-ის სარჩელებს, რაზეც „ბუკტოკი“ OpenAI-ს წინააღმდეგ საგამომცემლო სექტორის ბრძოლის შესახებ ადრეც წერდა.
30 ოქტომბრის ვადის ამოწურვამდე მოსამართლე სიდნი ჰ. სტაინისთვის გადაცემული 51 დოკუმენტიდან 26 მოსარჩელეების პოზიციას იცავს, 18 – OpenAI-ს, ხოლო რვა ნეიტრალურია. მოსარჩელეთა მტკიცებით, კომპანიამ ხელოვნური ინტელექტის მოდელების გასაწვრთნელად საავტორო უფლებებით დაცული ტექსტები, მათ შორის მეკობრული წყაროებიდან, უკანონოდ გამოიყენა. OpenAI კი აცხადებს, რომ მასალების კოპირება სამართლიანი გამოყენების (fair use) პრინციპს შეესაბამება და სისტემის მიერ შექმნილი შედეგები კანონს არ არღვევს.
რა პოზიციები გამოიკვეთა OpenAI-ს საავტორო დავაში
მოსარჩელეების მხარდამჭერ დოკუმენტში დოკუმენტალისტმა კენ ბერნსმა განაცხადა, რომ მოდელებმა მისი ფილმების ტრანსკრიპტები და თანმხლები წიგნები ნებართვის გარეშე აითვისეს, რათა იაფი კონკურენტული ფილმები შეექმნათ. საგამომცემლო ასოციაციებმა, მათ შორის ამერიკის გამომცემელთა ასოციაციამ (AAP), CCC-მ, IBPA-მ და STM Publishers-მა აღნიშნეს, რომ უსასყიდლო მითვისება საავტორო უფლებების არსს ეწინააღმდეგება მაშინ, როდესაც კომერციული ლიცენზირება შესაძლებელია. ლიცენზირების აუცილებლობაზე მიუთითა სააგენტო WME-მაც:
WME-ის პოზიცია ის კი არ არის, რომ შემოქმედებითი მასალების ხელოვნური ინტელექტის მიერ გამოყენება უნდა შეწყდეს, არამედ ის, რომ ამისთვის ლიცენზია უნდა გაიცეს.
საპირისპირო არგუმენტები წარადგინა ორგანიზაცია Authors Alliance-მა, რომლის თანახმადაც, ბაზრის შესუსტებაზე მითითება კონკურენციას უსაფუძვლოდ ზღუდავს. Electronic Frontier Foundation-მა სასამართლოს მოუწოდა, სამართლიანი გამოყენების დამკვიდრებულ პრეცედენტებს დაეყრდნოს და ახალი ტექნოლოგიების გამო საავტორო სამართალი ნაჩქარევად არ შეცვალოს. ამასთან, პროფესორმა მეთიუ სეგმა აღნიშნა, რომ ინტერნეტის მასშტაბით მონაცემთა ინდივიდუალური ლიცენზირება პრაქტიკულად შეუძლებელია, თუმცა კითხვები დასვა OpenAI-ს მიერ მასალებზე წვდომის მეთოდებზე. ნეიტრალურ დასკვნაში Wikimedia Foundation-მა განაცხადა, რომ ვებგვერდებიდან მასობრივი მონაცემების შეგროვება პლატფორმის ინფრასტრუქტურას აზიანებს.
დავაში აშშ-ის იუსტიციის დეპარტამენტიც მონაწილეობს, რომელმაც 4 სექტემბერს სასამართლოს მოუწოდა, ხელოვნური ინტელექტის გაწვრთნა სამართლიან გამოყენებად მიიჩნიოს. ამ პოზიციას ამერიკელი კანონმდებლების კრიტიკა მოჰყვა, რომელთა თქმითაც, მსგავსი მიდგომა საავტორო უფლებების დაცვას აზრს უკარგავს. ოქტომბერში მოსამართლე სტაინმა საქმიდან ამოიღო ემპირიული კვლევა ავტორების ხელოვნური ინტელექტით ჩანაცვლების შესახებ, რადგან OpenAI-მ მკვლევრის გაუმჟღავნებელი დაფინანსების კონფლიქტი გააპროტესტა. მხარეები საბოლოო შემაჯამებელ დოკუმენტებს 6 ნოემბერს წარადგენენ, რის შემდეგაც ზეპირი მოსმენები დაიწყება.
